ឯកឧត្ដម សុខ លូ ប្រធានគណបក្សប្រជាជនកម្ពុជាខេត្តកំពង់ធំ និងឯកឧត្តម ឈុន ឈន់ អនុប្រធានគណបក្ស រួមទាំងសមាជិកអចិន្ត្រៃយ៍គណបក្សខេត្ត នៅព្រឹកថ្ងៃទី០២ ខែតុលា ឆ្នាំ២០១៨ អញ្ជើញចូលរួមគោរពវិញ្ញាណក្ខន្ធ និងរំលែកទុក្ខយ៉ាងក្រៀមក្រំបំផុត ជាមួយគ្រួសារនៃសព ចំពោះមរណភាពរបស់ ឯកឧត្តម នៃ ប៉េណា សមាជិកប្រចាំការនៃគណៈអចិន្ត្រៃយ៍ ប្រធានគណៈកម្មាធិការត្រួតពិនិត្យ គណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានទី១ ព្រឹទ្ធសភា និងជាស្វាមីរបស់លោកជំទាវ មាឃ ឡាញ់ នៃ ប៉េណា ដែលបានទទួលមរណភាព កាលពីថ្ងៃសៅរ៍ ៥រោច ខែភទ្របទ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៩ ខែកញ្ញា ឆ្នាំ២០១៨ វេលាម៉ោង ១៣:០០នាទី ក្នុងជន្មាយុ ៧៤ឆ្នាំ ដោយរោគាពាធ។
ការទទួលមរណភាពរបស់ឯកឧត្តម នៃ ប៉េណា គឺជាការបាត់បង់នូវបញ្ញាវន្តដ៏ឆ្នើម និងជាឥស្សរជននយោបាយដ៏ឈ្លាសវៃមួយរូបរបស់គណបក្សប្រជាជនកម្ពុជា ដែលពោពេញទៅដោយឆន្ទៈ មនសិការ ចូលរួមចំណែកយ៉ាងសកម្មក្នុងបុព្វហេតុកសាង ស្តារ និងអភិវឌ្ឍសង្គម នាំមកនូវសុខសន្តិភាពជូនប្រជាពលរដ្ឋ និងមានតុភូមិកម្ពុជា ក៏ដូចជាបាត់បង់នូវ ស្វាមី បិតា ជីតា ជាទីគោរពស្រឡាញ់ ប្រកបដោយព្រហ្មវិហារធម៌មួយរូបចំពោះក្រុមគ្រួសារ ដែលបានចិញ្ចឹមបីបាច់ថែរក្សា និងអប់រំទូន្មានកូនចៅ ប្រកបដោយគន្លងធម៌។
ស្ថិតក្នុងវេលាដ៏សោកសង្រេងនេះ ឯកឧត្តម សុខ លូ និងប្រតិភូអមដំណើរទាំងអស់ សូមសម្តែងនូវសមានទុក្ខដ៏ក្តុកក្តួល សោកស្តាយ អាឡោះអាល័យជាទីបំផុត និងសូមចូលរួមរំលែកទុក្ខជាមួយ ក្រុមគ្រួសារនៃសព និងសូមឧទ្ទិសបួងសួងដល់ដួងវិញ្ញាណក្ខន្ធសព ឯកឧត្តម នៃ ប៉េណា បានសោយសុខក្នុងសុគតិភពកុំបីឃ្លៀងឃ្លាតឡើយ៕
