ក្រុមគ្រូពេទ្យជនជាតិកូរ៉េ មកព្យាបាលជំងឺទូទៅជូនប្រជាពលរដ្ឋនៅស្រុកកំពង់ស្វាយ ព្យាបាលដោយឥតគិតថ្លៃរយៈពេល២ថ្ងៃ
រសៀលថ្ងៃទី២៤ ខែមករា ឆ្នាំ២០២៤
ឯកឧត្តម ងួន រាសី អភិបាលរងខេត្តកំពង់ធំ បានថ្លែងថា មនុស្សគ្រប់រូបតែងតែគិតគូរខ្លាំងបំផុត គឺកត្តាសុខភាពចាំបាច់ខ្លាំងណាស់ ហើយប្រជាពលរដ្ឋក្នុងស្រុកកំពង់ស្វាយពិតជាមានសំណាងណាស់ដែលក្រុមគ្រូពេទ្យស្ម័គ្រចិត្តកូរ៉េបានចុះពិនិត្យ និងព្យាបាលជំងឺទូទៅដោយឥតគិតថ្លៃរយៈពេល២ថ្ងៃ ចាប់ពីថ្ងៃទី២៤-២៥ ខែមករា ឆ្នាំ២០២៤។ ការព្យាបាលជំងឺទូទៅ ស្ថិតនៅមន្ទីរពេទ្យកូរ៉េ ស្ថិតនៅភូមិរូង ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
ឯកឧត្តមអភិបាលរងខេត្តកំពង់ធំ បានអំពាវនាវដល់ប្រជាពលរដ្ឋនៅគ្រប់ទិសទីក្នុងខេត្តកំពង់ធំ សូមអញ្ជើញមកពិនិត្យ និងព្យាបាលជំងឺដោយឥតគិតថ្លៃ ឱ្យបានគ្រប់ៗគ្នា ព្រោះក្រុមគ្រូពេទ្យខាងលើមិនងាយបានមកព្យាបាលជូនដល់ប្រជាពលរដ្ឋកម្ពុជាឡើយ ហើយនេះគឺជាឱកាសល្អសម្រាប់ប្រជាពលរដ្ឋគ្រប់គ្នា ដើម្បីមកពិនិត្យ និងទទួលការព្យាបាលដោយគិតថ្លៃ។
សូមបញ្ជាក់ផងដែរថា ក្រុមគ្រូពេទ្យមកពីប្រទេសកូរ៉េ ព្យាបាលជំងឺដោយឥតគិតថ្លៃរយៈពេល២ថ្ងៃ ចាប់ពីថ្ងៃទី២៤-២៥ ខែមករា ឆ្នាំ២០២៤ ដោយឥតគិតថ្លៃ ដល់សាធារណជន ហើយការព្យាបាលនោះ មានដូចជា រោគកុមារ ផ្នែកជំងឺទូទៅ សន្លាក់និងឆ្អឹង ភ្នែក ត្រចៀក ច្រមុះ បំពង់ក រោគស្ដ្រី ជំងឺសើស្បែក មាត់ធ្មេញ វះកាត់ដុំតូច និងចាក់ម្ជុលវិទ្យាសាស្ដ្រជាដើម។
